कोशी प्रदेश सभाका सभामुख मा। अम्बर बहादुर बिष्टले हरितालिका तीजको अवसरमा सम्पूर्ण नेपाली दिदीबहिनीहरूलाई हार्दिक शुभकामना व्यक्त गरेका छन् । उनले जारी गरेको शुभकामना सन्देशमा यस चाडको महत्व र नेपाली समाजमा यसको स्थानको बारेमा उल्लेख गरिएको छ ।

सन्देशमा भनिएको छ, नेपाली हिन्दु नारीहरूले भाद्र शुक्ल द्वितीयादेखि पञ्चमीसम्म अविवाहित तथा विवाहित नारीहरूले आफ्नो मनोकाङ्क्षा र परिवारको हितको कामना गर्दै मनाउने हरितालिका तीज नेपाली समाजमा महत्वपूर्ण पर्वको रुपमा रहेको छ ।

सभामुख बिष्टले स्वदेश तथा विदेशमा रहनुभएका सम्पूर्ण नेपाली दिदीबहिनीहरूमा सुख, शान्ति, समृद्धि एवं अटल सौभाग्यका लागि शुभकामना व्यक्त गरेका छन् । साथै, उनले यो चाड समाजमा रहेको लैङ्गिक, जातीय विभेद लगायत सबै प्रकारका असमानताहरूको निराकरण गर्दै नेपालीहरूको बीचमा एकता र भाइचारा कायम गर्न सकोस् भन्ने कामना गरेका छन् ।