सन्तोष मेहता सुनसरी । मेडिकल व्यवसायी दुर्गा प्रसाईं सवार गाडीको ठक्करबाट घाइते भएका फुलेश्वर मेहताको मृत्यु प्रकरणमा थप विवरण सार्वजनिक भएको छ । मृतकका आफन्तका अनुसार बिरामीको अवस्था सुरुका तीन दिन सामान्य रहेको र एनेस्थेसिया दिएपछि मात्रै बिग्रिएको हो ।
दुर्घटनामा मेहताको टाउकोमा सामान्य चोट, हातको औंला भाँचिएको र खुट्टामा सामान्य चोट लागेको थियो । भोक्राहा नरसिंह गाउँपालिका वडा न ४ मा रहेको सप्तकोशी न्यूरो अस्पतालमा भर्ना भएका तीन दिनसम्म उनको अवस्था सामान्य रहेको र नियमित खानपिन समेत गरिरहेको आफन्तले बताएका छन् ।
“तीन दिनसम्म बिरामीको अवस्था राम्रै थियो । खाना पनि नियमित खान्थे । तर एनेस्थेसिया दिएपछि अचानक अवस्था बिग्रियो,” मृतकका आफन्तले भने ।
यसअघि मृतक पक्षले अस्पतालले बिराटनगर रेफर गर्न अस्वीकार गरेको र बि एण्ड सी अस्पतालको रेफर दिने वा सोही अस्पतालका चिकित्सक बोलाएर उपचार गर्ने भन्दै टारेको आरोप लगाएका थिए । बिरामीको अवस्था जटिल बनेपछि नोबेल अस्पताल लगिएकोमा त्यहाँ पुग्ना साथ मृत्यु भएको थियो ।
हाल मृतकको शव धरान स्वास्थ्य विज्ञान प्रतिष्ठानमा पोष्टमार्टम गरिएको छ । पोष्टमार्टम रिपोर्ट प्राप्त गरेपछि आफन्तले सप्तकोशी न्यूरो अस्पताल घेराउ गर्ने चेतावनी दिएका छन् । सप्तकोशी न्यूरो अस्पतालले भने आफूमाथि लागेको आरोप अस्वीकार गर्दै उपचारमा कुनै लापरवाही नभएको दाबी गरिरहेको छ । अहिले मृत्यु भएका फुलेश्वर मेहताको विषयमा सप्तकोशी न्यूरो अस्पतालमा मृतक पक्षसँग वार्ता भइरहेको छ ।
प्रहरीले दुर्घटना गराउने गाडी चालक र अस्पतालको लापरवाहीबारे समेत अनुसन्धान गरिरहेको जनाएको छ ।