विराटनगर । विराटनगरको रोडेशेष छेउ भूमि प्रशासन चोकको मुन होटल तथा गीत गजलका संचालक दिलिपकुमार भगतलाई एक समूहले खुकुरी प्रहार गरेको छ ।

खुकुरी प्रहारबाट भगतको हातमा चोट लागेको छ । उनको उपचारका लागि कोशी अस्पताल भर्ना गरिएको प्रहरीले जनाएको छ । भगत मुन होटलका संचालक हुन् । होटलमा आएका दुई जनाको समूहले आज साँझ ६ बजेतिर आक्रमण गरेको प्रहरीको भनाइ छ । भगतलाई विराटनगर ९ का पवन दास र विनोद रायले खुकुरी प्रहार गरेको मोरङ प्रहरीले जनाएको छ । उनीहरु फरार छन् । खोजी कार्य तिव्र बनाएको मोरङ प्रहरीका प्रवक्ता प्रहरी निरीक्षक हेमराज ओलीले जानकारी दिए ।

उक्त होटल विराटनगरको रोडशेष उत्तर भूमि प्रशासन चोकमा रहेको छ । हतियार प्रहार गरेर आक्रमणकारी भने भागेको प्रहरीको दाबी छ । पुरानो रिसिइबीकै कारण आक्रमण भएको हुनसक्ने प्रहरीले आशङ्का गरेको छ ।